Annegret Kramp-Karrenbauer

D Annegret Kramp-Karrenbauer (geboreni Kramp; * 9. Augschte 1962 z Völklingen), vylmol au mit ihre Initiale AKK gnännt, isch e dytschi Bolitikeri vu dr CDU un syt em 7. Dezämber 2018 d Bundesvorsitzeri vu dr Bartei. Si isch vu Augschte 2011 bis Februar 2018 Minischterbresidänti vum Saarland gsii un vu Juni 2011 bis Oktober 2018 Landesvorsitzeri vu dr CDU Saar. Syt Novämber 2010 isch si Mitglid im CDU-Bundesbresidium. Vu Februar bis Dezember 2018 isch si Generalsektreteeri vu dr Bartei gsii. Am 10. Februar 2020 het si aagchindet, ass si im Lauf vum Johr dr Barteivorsitz abgit un uf d Chanzlerkandidatur verzichtet.^[1]

D Kramp-Karrenbauer isch vu 2000 bis 2011 Minischteri in dr Regierig vum Saarland unter em Minischterbresidänt Peter Müller (CDU) in verschidene Ressort (Inners, Bildig, Sozials) gsii. Vu Merz 1998 bis no dr Bundesdagswahl 1998 isch si Mitglid vum Dysche Bundesdag gsii, vu dr Landdagswahl im Saarland im Septämber 1999 bis zu Merz 2018 Abgordneti im Landdag vum Saarland.

1. ↑ tagesschau.de: Kramp-Karrenbauer verzichtet auf Kanzlerkandidatur. Abgruefen am 10. Februar 2020.